siterihab.aladab@gmail.com
السبولة
غربلت حروفي و نقيتها
بعوين اللوح صفيتها
حبة حبة و شميتها
بستها زريعة نبتات
سبولة ذهبية عشقتها
…
غطيتها من الصهد البالي
حميتها من لكلام لمسالي
و كيف العادة
عرضت عل الحصادة
كل حصاد فيدو غمرة
و لسان ماضي
كل راس على راسو رزة
تحميه من لعرق الگادي
…
كل خطرة نبد بسم الله
نصلي على النبي سيد سيادي
كل مرة نعاود من لول
و نقر من ثاني
نلگاها سبولة نابتة فخيالي
نحكيها دواير زماني
…
شهدي يا الغمرة،
السبولة نبتات فأرض بلادي
تلمع وتلالي
مخلات
من حقها و ضوات لي مكاني
ختارت
ما عندها قدماتو لي هوى غالي
هوى
أرضي نسيم ما يتقاضى ما هو فاني
كتبتو
بكل حروف و رسمتو فخيالي
سبولة نعمة حفظتها لزماني
حب
وعشق ما ليه مثال من لمثالي
ينشد بيه كل حبيب فاهم لمعاني
…
أنا على
سبول بلادي مغيار و ديما في بالي
بان لي صفهم لونو مخنتر يتسناني
لبست لباسي جلالبة و رزة وسلهامي
و دخلت معاهم للسربة نعيط و نشالي
ليكم يا سبول بلادي ننشد بنشادي
بيكم نفتخر وليكم نظمت كلامي
هداو لي زربية و حنبل خميسي
و وشمت وشمة و وليت فنان نقاسي
نرقص
و نحيدس بهواك يا زينة البلداني
…
كل مرة نعاو من لول
ونقر من ثاني
نلگاها سبولة نابتة فخيالي
نحضنها و نحكيها محاين زماني
… آه يا زماني
و آه عليكم يا الحطابة
مسحو دموع الغابة
بيها غناو وعليها جابو لمعاني
عيات ما تبكي من الريح
ومن الذيب العاوي
…
يالله نصيدو موكا و لغراب
يالله نمسحو لمرايا من الضباب
يالله نشعلو الضو
و نحفظو لكتاب
يا الله نحزمو السير
و نكشفو سر البير
و نهرسو الدلاح الخاوي
يالله نديرو النوبة والصف
و نشدو بيدين اللي تلف
و نخاويو لمعاني
و يشعل الضو و ما يطفى
و العين تنبع بالما صافي
يبان السر وما يخفى
و نلگ ليك غطا يا الحافي
…
يا سبولة عذابي الهامي
و خوفي عليك زاد محاني
خايف السما تغضب
والأرض تجدب
خايف لقلوب تقسى
و لعقول تلهى
خايف الشيوخ تنسى
و لولاد ما ترصى
و عذابي الهامي
…
نسولك يا سبولة
وقتاش يبر باسي
وقتاش يواتيني لباسي
وقتاش نعلي ساسي
و وقتاش يفهمو لمعاني
…
انت دوايا و انت طبيبي
انت گريني و انت و نيسي
كل مرة نغربلك يا حروفي و نقيك
و بعوين اللوح نقراك و نصفيك
و كل مرة نعنگك و نشمك و نحضيك
يا الكاوياني
ـ
إدريس الهكار
Share this content:
