(مَال الخاطر)

مَالْ الخَاطر سَاعةْ نَكْسَة

تسعݣب الݣلب ساحت لمحبَّة بَاطْلْ

شَاطُو ثَلْثْ دَقَّاتْ

تَكْ تكْ تك

مكتاب اللّه شْهَقْ مَات

كان كِيمَا شمعة دابت

وَلاَ ݣَرُّو بخيرها اللِّي عليهم ضَوَّاتْ

كان كِيمَا عْوِيدْ النَّدّْ

عَطَّرْ عطر حتَّى ما بقى ݣدّْ

وتلاََّتْ عظامُو رْمَادْ

كِيمَا جُرْح قْدِيم

عَلَّمْ عْلَى ذَاتْ

كِيمَا كِيَّةْ مَحبَقْ سَاعَةْ ݣْلِيع الوردْ

وحُرݣَةْ النّْدَى على فْجَرْ

بكْرِي باع الودّْ

ودَّر حْلام بين جزر ومدّْ

خَان برَيَّاتْ العَشْقْ

وبْݣُرْشْ مْصَدِّي بَاعْ السَّعدْ

باع فياق في غُرْقْ نعاسُو

وشرى بِلَغْلَا تلْفَة مَا ليهَا حَدّْ

تَلَّفْ لُوفَى

زَكْرَمْ شَرْجم لَغْرَام وسَدّْ

وسدِّيتْ ونَيَّرْتْ الماضي

لَحَّفْتُو بالنِّسيان بعد طَال المُدّْ

وجا لبْغُو من ثاني

تَكْ تَكْ تك

تَكْتَكْ الݣلب وبْغِيت وانا في هَاذ الݣَدّْ

وبْدِيت نحلَّفْ في السَّاكنِي

نْسَامِي عْنَادِي بعنادُو

ونزيدْ في العَنْدْ

نطلُب معاني كانت طَايْعَانِي

تْحَامِي سَاعْةْ يْشَدّْ الضَّدّْ

للّٰه يَا مْعَاني كانت بِينَّا رقَّاص

للّٰه يَا حَرف كان جُوهر

محَزَّم بِنْصَاص

بْقَى على العَاهد

وبْقَى لَلْݣَانة ونَّاسْ

هيَّ تْݣُولْ ولد لحرام سَاكنِي

وانت ݣُول إِيهْ بنت لحرام سَاحراني

وسحُورها فات لقياس

لله يا ضحكة كَبْرتْ فيَّا

وعَرَّاتْ على اللَّخْرة في الضّْرَاسْ

لله يا رَمْشْ لَا تْغُشّْ

لاَ تَرْكَسْ الشُّوفَة بدْمُوعْ

وبْقَى على بَابْ الرّْجَا عسَّاسْ

شمس ضَدّْ في الظّْلَام

وشَهْدَة ضَدّْ في الحَال يْلاَ مْسَاس

عُݣْدَة في حزام هَايْنَة

حلمة كانت وكاينة

ݣْبل تكون لمخدَّة..

وݣْبَلْ ݣَاعْ ما يكون النّْعَاس

للّٰه يا تْبُورِيشَة خْطَاهَا عَرْفْ

وخْتَارتني دُونْ النَّاس

حِايْزَة ضُرِّي كِي عْرَيْشْ الشِّيحْ

نْطِيحْ في هْوَاها

وفي عظامي هِيَّ تْطِيح

للّٰه هزِّينِي دَقَّة دقة

وخَلِّي هَمْصَاتك تْحَنّْ

سَاعَةْ نكُون لَكْ ٱنَا تَسْريحْ

حُوزِينِي بِينْ المَجْيَاتْ

وحَسْبِي تنْهَادِي غْنَى وشطيح

يا فَرْحَة جَايَانِي على سكَّة

طَالبَة دْفَايَا

عاشقة في حدَاقِي تَتَكَّى

هَا جْوَارحي ليك صَلاَّيَة

وكُونِي في يَدِّي تسبيح

وخَلِّي في لخاطر تيساع لَحدِيثْ اللِّيل

وخُودي تعناݣْ راكبَاهْ حَمَّة

يرجع بين درعانك صحيح

يفدفد الݣلب بعد سكاتو يَحْيَا

ونْحْيَا علاش ݣَالُو الحُبّْ زين

تكون الذَّاتْ مَعلُولَة

شَادَّة لفراش تْنِينْ

وعند الزّْهُو تْوَلِّي لَبَاس

عند الزهو تولي لباس